HE AHA IA MEA HE PONO?

Aloha oe e ko’u mea heluhelu,

I keia makahiki e piha ana he eha makahiki o ka noho alii ana o Pelekikena Biden i Amelika la. A ke kokoke mai nei ka manawa e koho ai na kupa Amelika i ko lakou pelekikena hou. He 2 moho nui, o Joe Biden a me Donald Trump. O ka’u ninau keia i ka poe o Hawaii, pono ia kakou e koho paloka? 

He aha ia mea he pono? O ke kino kanaka, he aina, he mea ai, he wai, he hooikaika, he hale kekahi mau mea e pono ai. O ka naau, he aloha, he maluhia, he hauoli kekahi mau mea e pono ai. O ka manao, he oiaio, he lokomaikai, he hoomanawanui kekahi mau mea e pono ai. 

E hoi hou kaua e ka mea heluhelu i ka ninau e kau ae nei i luna. Pono ia kakou e koho paloka? O ke aupuni Amelika ka mea nana ka mana e kau a e hooko ai i na kanawai i keia manawa. O ke kanawai ka mea e malu ai na kupa o ka aina. Ina aole na kanawai, lilo kanaka i na hana hoopailua a me na hana haunaele lapuwale o ke ao nei. No laila, he pono ke ku ana na kanawai. 

Eia no nae, aole no i pono ka poe i hookumu i ke aupuni kuikawa. Oia poe like no i kono i ka moku kauwa Boston SS e holo mai. Oia poe i hoopaa ia Liliuokalani, ka moi o Hawaii iloko o kona hale ponoi. Ka poe i kumakaia i ko lakou aupuni ponoi iho. Aole o kana mai ka hewa o ia poe loko ino! 

Aole o keia mau hana wale iho no, ua hoonalonalo aku la lakou i ka oiaio. Aole i pulima ia he palapala hoohui aina e Liliuokalani. No laila, aole i hoohui ia ka pae aina nei me Amelika huipu ia me ka pono. Me ka hewa no nae i hoohui ia ai. 

Ma muli o na hana inoino a ka poe kumakaia aupuni, ua lilo keia pae aina ia Amelika a eia ke noho nei ka poe puali koa Amelika mawaena o ka lahui Hawaii a hiki i keia manawa. He lehulehu wale na malihini e pae mau mai ana ma na kaha one o na mokupuni Hawaii. Ua lilo pu ka nui o na apana aina i na malihini waiwai a kuonoono. He wahi auau kela ia lakou. 

He 131 makahiki ka loihi o ka noho alii ana o ke aupuni Amelika ma luna iho o ke aupuni o ka pae aina Hawaii. A i kela me keia makahiki e hala ana, hoonui ia mai ka eha me ka wela o ka lahui Hawaii. I ka la hea e hooponopono ia ana keia hewa e kau kaumaha nei ma luna o na poohiwi? I ka la hea la?

A eia kou mea kakau ke hoike hou aku nei i ka ninau nui a’u, pono ia kakou ke koho paloka? Aole no ke kulana Pelekikena wale no, ke kulana kia aina, ke kulana luna makaainana, a pela aku. He pono ke koho ana i kekahi moho e holo ana? 

Aole au e manao nei e hoohulihuli i ka manao o ko Hawaii i kela aoao paha a i keia aoao paha. Aole kela ka’u kumu e kakau nei no ke koho paloka. I ko’u manao, he mea koikoi ka noonoo ana no keia ninau a mea na ninau okoa e pili ana i keia mea he pono. Aia la i hea ka pono?

Owau no,

Malu