KA LA HANAU O KUU WAHINE

I kela mahina i hala aku nei, ua lawe aku la au i kuu wahine i keia hale paina i Waikiki la, oia hoi, o Eating House 1849. Aia keia hale iloko o ka International Market Place.

Ka Hale Hoikeike Kii

Aia maua e hele wawae ana ma ke ala nui o Kalakaua ma waena o ka poe malihini a e huli ana i wahi e paina ai. Ua loaa aku la keia hale me na hale paina like ole o loko ona. A he mea ai ono ole i ko maua mau maka. A hoomau aku no maua i ka hele a hiki i ka loaa ana o keia hale e hoikeike ana i na kii pena. He kaha kii ka hana a ka'u wahine. A oia ko maua kumu i komo malihini aku ai i loko o laila me ka makaikai nanea ana o na maka i na kii noeau o ka hana ana. I keia mau la, aole o ka pepa wale no kahi e paa ai ke kii a ka mea e kaha ana. O ka laau, ka hao, ka lole, a he nui hou aku no na mea kahi e paa ai keia mea o ke kii. Ua nanea maoli no ka nana ana i kela mea keia kii e kaukau ana ma luna o na paia. I ka puka ana i waho, ua hoomau mau ai ka huli i kahi e hoomaona ai i na opu.

Eating house 1849

Ia maua e hele wawae like ana, ua loaa keia ala pii e hiki ana i ka papa hele akea. Ma laila no e ku ana ka hale paina o Eating House 1849. Akahi maua a ike i kela hale. Aole no hoi maua i lohe iki no keia hale paina. Me ka manao lana no maua i komo aku ai. A ua hui hou ae la au me kekahi hoa kula, o Harry kona inoa. Ua noho haumana maua ma ke kula o Windward Community College i ka makahini 2017. Hauoli au i ka hui hou ana me ia. 

Ua noho iho la maua o ka'u wahine ma ko maua pakaukau a hoomaka aku la e nana i ka papa kuhikuhi mea ai. Eia ka maua mau mea i oka (order) ai. 

• Ume Glazed Grilled Pork Bao Buns
• Chicken Spring Rolls
• 1849 Hapa Burger
• Shrimp and Scallops

He ono wale no na mea ai a pau loa i loaa mai la ia maua. I kela me keia nanahu ana, ike ia iho la ka onoono maoli io no. Ma anei au e hai aku nei ia oe e ka mea heluhelu, ina oe e hele aku i Waikiki, e ai no ma laila. Keu a ka ono!

I ka hoomaopopo ana o Harry, oia ka la hanau o ka'u wahine, ua hele aku a hoi koke mai la me ka mea ono Melting Hot Chocolate Soufflé. Haawi aku la maua i ka mahalo oiaio no kona oluolu ma ka haawi manuahi ana mai. Aole o kela wale no, he 2 a 3 paha mea ai hou ae kana i makana mai ai. A i ka wa a maua e noho nanea ana ma kela hale, oia ka manawa i piha mai ai ko'u naau i ke aloha. Malama ka Hawaii i ka Hawaii. O ke aloha ka mea makamae e noho nei i loko o ka naau o ka lahui Hawaii. Aloha no oe e ke hoa. E ola oe a e loaa aku no ia oe kou mau makemake a apau. 

Ka hoi ana i ka hale ohana

I ka pau ana, ua maona ino loa na opu o maua. Ano eha i ka piha. Eia ka, he hauoli no ma ka naau. I loko no o ka nanea me ka hauoli o maua i ka ka huakai hele i Waikiki, haohao nui iho la maua i na kamalii. Aole maua i kaumaha i ka hoi ana aku ia lakou, no ka mea he oiaio a he ikaika ko maua aloha ia lakou pakahi a pau. Ua hoi aku la no maua i Kailua, i ka hale noho me na keiki ekolu. Ua piha ka opu i ka mea ai ono, ua piha ka hale i ka ohana, ua piha no hoi ka naau i ke aloha. 

Mahalo no ka heluhelu ana i keia moolelo a'u. 

Ke aloha nui,

Maluhia States